Akhter Shirani sahib ki aik Umdah Nazam

ستارے    نذر    کروں ،  آفتاب     نذر    کروں؟  

کلی  کا  حُسن,  گُلوں  کا  شباب   نذر   کروں؟

ریاضِ   خُلد   کی   شادابیاں    کروں   حاضر؟
نگاہِ    حُور   کا   رنگیں   حجاب   نذر  کروں؟

صباحتِ   رخِ   شیریں   کا    ارمغاں   بھیجوں؟
لبِ  سلیمیٰ   کا  لعلِ  خوش  آب   نذر  کروں؟

غزالِ    دیدہء     لیلائے    نجد   بھجوا   دوں؟ 

خُمارِ   چشم ِ   زلیخا   کا  خواب  نذر   کروں؟ 

کِھلونا   چاہئیے  گر  کوئی   کھیلنے   کے   لئے
چُرا   کے  زہرہ   کا   زرّیں   رباب   نذر   کروں؟

یہ سِن ہے وہ کہ ستاروں سے بھی ہے پردہ ضرور
شعاعِ   مہر   کا    زرّیں    نقاب   نذر   کروں؟

مطالعے    کی   تمنّا    ہو    گر    نگاہوں    کو
تو   کہکشاں  کی  طلائی   کتاب  نذر   کروں؟

مذاقِ    شعر    کی   لازم   اگر   رعائت    ہو
تو  شاعرانِ   جہاں   کا   جواب   نذر   کروں؟

 ز بسکہ    سالگرہ   چودھویں   ہے  حسرت ہے
کہ  مَیں  بھی چودھویں  کا ماہتاب  نذر  کروں؟

قُبول  ہوں  نہ  یہ  تحفے  تو  کیا  کروں   آخر؟
کہو   تو  مَیں  دلِ  خانہ   خراب  نذر   کروں؟